اشتغل اي حاجه

قالولك اشتغل اي حاجه المهم انك تجيب فلوس , شيل طوب و رمل مش عيب ومش حرام , المهم انك تجيب فلوس ويبقي اسمك شغال ,وقبلها قالولك اتعلم علشان تبقي حاجه وتجيب برده فلوس , هما قالو كتير والنتيجه !!!

 اشتغل اي حاجه
اشتغل اي حاجه


 اشتغل اي حاجه 


بعد ما هتخلص جامعه هتبدء تدور علي شغل بمؤهلك وانت بتدور وانت عارف انك مش هتلاقي لكن الامل جواك كبير وطموحك ملوش حدود, لكن الحقيقه انك غالبا مش هتلاقي.

ببساطه مؤهلك مش مطلوب في السوق والوظائف المناسبه ليك محجوزه وكمان انت خريج جديد ومعندكش مهارات ولا كوسه.
هتبدء تسمع الجمله ديه كتير اشتغل اي حاجه المهم تجيب فلوس حلال, اشتغل امن او اشتغل كول سنتر اقولك اشتغل كاشير في محل بقاله وبجد الكلام ده فعلا هيجيب فلوس ومش عيب انك تلاقي واحد بيقول عايز اشتغل اي حاجه.



لكن الحقيقه انك لو اشتغلت اي حاجه انت مش حابب تشتغلها هتفشل فيها او تعيش كاره الدنيا والحياه لانك ببساطه ملكش اختيار فيها

اشتغل اي حاجه اشتغل هنا سنه وهنا شهر هات لبس واخطب واجوز بس خليك عارف انك لما توصل الثلاثين هتبقي فرصتك اقل

والشغل الي كنت بترفض تروحه مش هتتقبل فيه.


الحكايه ببساطه ان اي صاحب عمل عايز عماله رخيصه وبتاعت شغل وده بيلاقيه في حديثي التخرج عندهم طموح وعايزين يتعبوا,

فاهمين ان نحت الصخر انك تشتغل شغلانه مبتحبهاش وتبذل فيها كل مجهودك تشتغل 14 و16ساعه وبالتالي هو فلوسه هتزيد وبعد كده يشوف غيرك وهكذا.

المشكله انك لما توصل ثلاثين هيبقي مطلوب منك تقول انا شغلتي كذا وخبرتي في كذا وعايز مرتب كذا بس ازاي انت اشتغلت كثير وعرقت وتعبت وشلت الطين بس ان يكون ليك مجال فعال مفيش, الامن والكاشير والكول سنتر وغيرهم , في منهم كثير واصغر منك وهيقبلو بالمرتب القليل .

الحلشوف انت تحب تشتغل ايه والمتوفر ايه 


  • اقعد مع نفسك وشوف انت عايز تبقي ايه (لو مش عارف ده الطبيعي بجد)
  • انت محتاج تتعلم وتطور نفسك بس ده هياخد وقت وفلوس (وغالبا هتكون مش عارف تطور نفسك ازاي وايه المناسب ليك) 
  • فعلا انت محتاج تشتغل لكن الصح انك تشتغل بس مش اي حاجه فكر الاول و نصيحتي ليك انك تتعلم صنعه ايوه تبقي صنايعي وتشوف الدنيا بعين السوق مش بعين طالب الجامعه 


لماذا يجب ان تتعلم صنعه 


1- لما توصل ثلاثين او اكثر وتبقي صاحب بيت واولاد هتعرف الاجابه الكامله علي السؤال ده 
2- متوسط يوميه الصنايعي 200 جنيه وحسب المجال لكن لا اظن ان فيه اقل من كده ,ولاحظ ان ده لو مش شغال لحسابه
3-الصنعه هتتعلمها في 3 او4 شهور ولو تركت المكان الي اتعلمت فيه هتلاقي غيره بدخل اكبر غالبا.
4-هتشوف الدنيا وتتعلم تتعامل بشكل واقعي وتتعلم لغة السوق  
5- تقدر تطور نفسك وانت شغال عادي جدا يعني تبقي نقاش الصبح وبعد ماتروح بتذاكر برمجه او لغه جديده.
6- لو اتوظفت اعتمادك كله هيكون علي الصنعه مش علي الوظيفه 

طيب انا اتعلمت حوالي 17 سنه علشان في الاخر أبقي صنايعي وأتعلم من واحد ممكن يكون مبيعرفش يقرأ ويكتب طب انا اتعلمت ليه واهلي هيقولو ابننا شغال ايه ونظره الناس 

للاسف ده حقيقي بس اغلب الصنايعيه متعلمين وانت اتعلمت علشان تشتعل بشهادتك تجيب فلوس او حاجه انا مش فاهم هي ايه 
 لكن انت اتعلمت  وممكن تشتغل اي حاجه تانية انت حر انا بس عايزك تاخد بالك  من موضوع الصنعه ده

اما موضوع اهلك ونظره الناس ليك  مش هتيجي حاجه في نظرتك لنفسك وانت نفسك تاكل حاجه من محل ومنتظر ابوك يشتريهالك (مرتب الكاشير او الامن مش هيكفي مواصلات ولبس واْكل وكورس او جمعيه علشان تجوز )

وبالمناسبه لو ليك اخت عروسه هتفرح بيك وهي بتقول اخويا جابلي ثلاجه ماركه كذا الخ  , ولو مجوزه هتسناك علشان تدخل عليها بشنطه فاكهه محترمه او موسم و لو جوزها تعب شويههتوقف جنبه  بجنيه من عرقك صدقني اختك هتبقي شايفاك سيد الرجال وسندها في الدنيا.

قولي انت بقي نظرتك انت للناس ايه لو انت قعدت من الشغل (المؤقت او الموجود) فجأه وبقيت عاطل ومش عارف تشتغل حاجه .



كيف تتعلم صنعه 

1- حدد المجالات الاقرب اليك (كنت مبسوط وانت بتتفرج علي الصنايعي فيها وهو شغال)
2- ادخل علي اليوتيوب وهتلاقي فيديوهات بتوضح وتشرح الشغلانه بالتفصيل ابدء اتعرف عليها وشوف هتناسبك ولا لا 
او هتلاقي في اقسام موقع اتعلم دليفري مجالات كثير فنية  ادخل وشوف 
3- ابدء شوف ورشه كبيره شويه واقدم فيها واشتغل وحاول تصبر 3 شهور هتتعب شويه معلش اصبر واستحمل بعد كده هتبقي صنايعي وممكن تاخد شغل لوحدك 


 وخليك عارف انك تتعلم صنعه اهم من انك تاخد كورس انت مش هتشتغل بيه و ابقي طور نفسك بس وانت صنايعي مش بتاخد مصروف 

 وخليك عرف ان الي  بينصحك انهارده بانك تشتغل اي حاجه من غير تفكير هو اول واحد هيدوس عليك بعدين 

وانك تتعلم صنعه مطلوبه زي الكهرباء - السباكه -الحداده- الدهانات الخ  وانت لسه خريج جديد  هيفرق معاك كثير هتتعب في الاول لكن هتبقي  في يوم كبير ولو انهارده بتمد ايدك تاخد من الحاج المصروف بعد كام شهر هتدخل معاه شريك في خروف العيد

اشتغل الشغلانه الي تكون حابب تشتغلها اصبر ومتتسرعش رزق جايلك متقلقش لكن باللهي عليك فكر كويس الوقت هيمر ومش هتعرف ترجعه تاني  والله الغني الرزاق.